Landhelgisgæslan vekur athygli á því í tilkynningu að stórstreymt er næstkomandi laugardag og því há sjávarstaða yfir helgina.
„Samhliða spáir Veðurstofan hvössum vindi af suðlægum áttum næstu daga og gera ölduspár jafnframt ráð fyrir mikilli ölduhæð suður og vestur af landinu yfir helgina og fram á mánudag. Því má gera ráð fyrir talsverðum áhlaðanda við sunnan- og vestanvert landið og að sjávarhæð geti orðið hærri en sjávarfallaútreikningar gefa til kynna. Landhelgisgæslan hvetur því til aðgæslu við sjávarsíðuna og á hafinu og að hugað verði að skipum og bátum í höfnum, segir á vef Landhelgisgæslunnar.
