Hvalatalningar á Árna Friðrikssyni HF200, sem hófust mánudaginn 1. júlí, hafa gengið samkvæmt áætlunum og sér nú fyrir endann á þeim, að því er segir á vef stofnunarinnar. Þessi hluti hvalatalninganna fer fram samhliða 15. makrílleiðangri stofnunarinnar og með þátttöku fjölda annara þjóða við Norður-Atlantshafið. Fyrsti hlutinn var samhliða karfaleiðangri sem stóð mestan part júní.
Réttsælis kringum landið
Leiðangurinn hófst í Grænlandssundi um 100 km vestur af Látrabjargi þar sem komið var á fyrstu leitarlínuna. Síðan fikraði leiðangurinn sig austur með Norðurlandi þar sem ystu mörk svæðisins voru við 200 mílna mörk íslensku lögsögunnar, síðan suður með Austurlandi og loks vestur með Suðurlandi þar sem farið var suður að 200 mílna mörkunum og svo norður með Vesturlandi.
Árni Friðriksson er núna staddur skammt undan Snæfellsnesi en breyta hefur þurft af áætlaðri leið vegna brælu. Áætlað er að talningunum á Árna Friðrikssyni ljúki laugardaginn 3. ágúst.
Þoka og hafís
„Á þessu stigi er erfitt að segja til um árangur en þoka og hversu vindasamt hefur verið á hafsvæðinu hefur haft all nokkur áhrif á skyggni og möguleika til leitar. Allar helstu tegundir hvala hafa sést en vegna þess hve vindasamt hefur verið og auk þess þoka, hefur líklega minna sést af smáhvölum en búast mátti við. Sést hafa nokkrir svínhvalir af tegundinni norðsnjáldri (Mozoplodon bidens) sem eru einhverjir þeir sjaldgæfustu á þessum norðlægu slóðum.“
Veður geta verið rysjótt á Grænlandssundi um hásumar og eins má eiga von á hafís á þeim slóðum eins og raunin var í upphafi leiðangurs. Þoka hafði áhrif á skyggni og hafís lá yfir hluta af áætluðu leitarsvæði. Á fyrsta legg norður, um 250 km NV af Straumnesi dreif hafís loks og sáust þá hnúfubakar, búrhvalir og langreyðar.
