Huginn VE hefur makrílveiðarnar eins og oft áður

Huginn VE landaði á mánudag nálægt 500 tonnum af frystum makríl en alls var aflinn nálægt um 600 tonn. Guðmundur Huginn Guðmundsson segir talsvert um makríl og honum líst vel á framhaldið. Huginn VE er jafnan með fyrstum skipum til að hefja makrílveiðar. Önnur skip höfðu ekki hafið makrílveiðar en þó voru uppsjávarskip HB Granda farin að huga að þessum veiðum. Kvótinn á yfirstandandi vertíð er samtals um 168 þúsund tonn en var á síðasta ári 148 þúsund tonn. Heildarverðmæti makrílaflans í fyrra var tæpir 11 milljarðar króna.

Drjúgt af makríl

„Það virðist enginn vita af því að makríllinn er kominn. Það er enginn að leita og bara einhverjir bátar sem verða varir. Við höfum verið að fara bara þetta í klukkutíma stím og það er drjúgt af honum. Við erum að frysta og þurfum ekki það mikið í hvert sinn. Við erum búnir að þvælast dálítið um því það var bræla stóran part af síðustu viku. En við höfum víða orðið varir. Líka vestan við Eyjar. Makríllinn var mættur fyrir nokkuð löngu þótt við höfum bara byrjað fyrir rúmri viku,“ sagði Guðmundur þegar rætt var við hann á mánudag.

Guðmundi finnst líklegt að menn séu ekki mikið að flýta sér að hefja makrílveiðar þar sem makríllinn hefur ekki enn náð að fita sig mikið ennþá.

Lítur ágætlega út

„Það er þó alveg ágætt ástand á honum miðað við árstíma. Ég er samt ekki farinn að fá nákvæmt fituhlutfall en hann lítur ágætlega út. Við erum að landa núna bæði heilfrystu og hausuðu líklega á milli 400-500 tonn eftir eina viku á sjó. Svo er alltaf eitthvað af fráflokkuðu sem fer til bræðslu. Samtals erum við með um 600 tonn upp úr sjó. Við værum að sjálfsögðu búnir að fiska mun meira ef við værum ekki að frysta. Við tökum bara eitt hol og svo er legið í vinnslu. Á þessum tíma hefði ég örugglega náð 1.500-1.600 tonnum ef við værum bara á veiðum.“

Selja til Egyptalands

Kvótinn á yfirstandandi vertíð er samtals um 168 þúsund tonn en var á síðasta ári 148 þúsund tonn. Heildarverðmæti makrílaflans í fyrra var tæpir 11 milljarðar króna.

Guðmundur segir að útlit sé fyrir að nokkur þúsund tonn af frystum makríl verði seld til Egyptalands og verðið sé vel ásættanlegt í dollurum. Dollarinn sé hins vegar lágur gagnvart krónunni. Verðið sé svipað og í fyrra og hugsanlegt lítið eitt hærra.