Hafrannsóknastofnun og Alþjóðahafrannsóknaráðið leggja til, í samræmi við aflareglu íslenskra stjórnvalda, að afli fiskveiðiárið 2025/2026 verði ekki meiri en 203 822 tonn. Þetta er 4% minnkun frá fyrra fiskveiðiári og dregst ráðlagður afli saman aðallega vegna minnkunar í stofnstærð auk þess sem stofn- og aflaþyngdir eftir aldri hafa lækkað. Þetta er niðurstaða Hafrannsóknastofnunar í ráðgjöf hennar vegna fiskveiðiársins 2025/2026.

Á fyrra fiskveiðiári hljóðaði ráðgjöfin upp á 213.214 tonn svo ráðgjöfin nú þýðir 4% samdrátt. Fara þarf allt aftur til fiskeiðiársins 2012/2013 til að finna lægri ráðgjöf í þorski sem þá var 196.000 tonn.

Stækkun hrygningarstofns

„Stærð hrygningarstofns fyrir hvert ár síðustu fjögurra ára er nú metin hærri en mat þeirra tíma, sem gefur til kynna tilhneigingu til þess að vanmeta stofnstærðir. Í núverandi stofnmati er umtalsverð hækkun á mati á stærð hrygningarstofns eftir 2020. Þessa hækkun í mati má rekja til breytinga á uppsetningu líkansins nú ár sem tekur tillit til líklegrar Grænlandsgöngu. Þessari Grænlandsgöngu varð fyrst vart vegna óvenju mikils fjölda 6 ára þorsks árið 2021 (2015 árgangurinn), mun meiri en vænta mátti út frá fyrri athugunum. Þessi mikli fjöldi hélt áfram að koma fram í öllum mælingum næstu ár á eftir. Á sama tíma mældist þessi sami árgangur stór við Austur-Grænlandi, bæði í stofnmælingum og í veiðum, sem rennir frekari stoðum undir göngu frá Austur-Grænlandi. Þetta er þrettánda gangan sem metin er á tímabili stofnmatsins sem nær frá 1955. Allt voru þetta þorskar á aldursbilinu 6 til 9 ára sem líklega komu frá Grænlandi,“ segir í mati Hafrannsóknastofnunar á ástandi þorskstofnsins.

Áhrif ástands loðnustofnsins

Þar segir einnig að afla- og stofnþyngdir eftir aldri síðustu tvö árin hafa verið undir langtímameðaltali. Loðna er mikilvæg fæða þorsks á Íslandsmiðum og stofnstærð loðnu hefur verið tengd við vöxt þorsk. Lægri meðalþyngdir þorsks eru líklega tengdar verra ástandi loðnustofnsins undanfarin tvö ár. Lægri meðalþyngdir í afla en þær sem spár gera ráð fyrir geta valdið hærri fiskveiðidauða en áætlað var. Við þessar kringumstæður aukast líkur á því að stofnstærðin minnki til skemmri tíma litið.