Ekki er langt síðan konur fengu ekki brautargengi til náms og í vísindastörfum hérlendis.
Þetta segir í færslu á vef Hafrannsóknastofnunar sem í dag Alþjóðlegum degi kvenna í vísindum. Í ár sé tíu ára afmæli dagsins og þrjátíu ár frá kvennaráðstefnu Sameinuðu þjóðanna í Beijing.
„Við það tilefni voru gefin fyrirheit um bættan hlut kvenna um allan heim og stjórnvöld margra landa samþykktu framkvæmdaáætlun sem hafði það markmið að skila árangri í jafnréttismálum. Alþjóðlegur dagur kvenna í vísindum er því skilgetið afkvæmi kvennaráðstefnu Sameinuðu þjóðanna í Beijing árið 1995 og aðgerðaáætlunar sem samin var í kjölfarið,“ segir á í færslunni.
Breytingar hægt og rólega
„Á Íslandi njóta konur meira jafnréttis þegar kemur að þátttöku í vísindastörfum og tækifærum til náms en víða í heiminum. En það er ekki langt síðan að konur fengu ekki brautargengi til náms og í vísindastörfum hérlendis. Eitthvað sem flestum þykir fásina í dag og sem betur fer hefur þessi staða breyst hægt og rólega á liðnum árum og áratugum,“ segir á vef Hafró.
Þá segir að fyrir fimmtíu 50 árum eða árið 1975 hafi konur aðeins verið 9 prósent starfsmanna Hafrannsóknastofnunar, eða 14 af alls 125 starfsmönnum. „Heyrðist stundum sagt að það þætti ekki vera kvenmannsverk að fara í rannsóknarferðir á sjó, þó vissulega hafi fáar en öflugar vísindakonur farið í slíkar ferðir á þessum tíma,“ segir í færslunni. Í dag séu konur 36 prósent af heildarstarfsmannafjölda en 45 prósent sé horft til starfsmanna utan áhafna. Hlutfall kvenna meðal vísindafólks hafi þannig hækkað hægt og rólega.
Staða kvenna víða erfiðari
„Þó svo þróunin hafi verið konum í hag á Íslandi á síðastliðnum áratugum er staða stúlkna og kvenna víðsvegar í heiminum gagnvart námi og þátttöku í vísindastarfi enn víða jafn erfið (og erfiðari) en hún var á Íslandi um miðbik síðustu aldar og fyrr og því er mikilvægt að fagna deginum með hvatningu til allra stúlkna og kvenna um að sýna vísindum áhuga og taka þátt í vísindastarf,“ segir á vef Hafrannsóknarstofnunar þar sem nánar má lesa um málið auk viðtals við Sigurlínu Gunnarsdóttur rannsóknarmann sem unnið hefur hjá stofnuninni alla sína starfsævi fyrir utan sumarstörf með menntaskóla.
„Eftir á að hyggja finnst mér stundum faglegt líf mitt hafa verið röð tilviljana en um leið líka eins og mér hafi verið stýrt í ákveðna átt,“ segir Sigurlína meðal annars í viðtalinu.
