Á sama tíma og neta- og dragnótabátar veiða vart í soðið hafa línubátarnir komið til hafnar með ágætan afla. Algengt er að stærri línuskipin hafi verið með 60 til 80 tonn af fiski í róðri og það eftir aðeins fjóra til fimm daga á sjó.
Afkoman á línuskipunum hefur verið með miklum ágætum. Þorskurinn hefur verið seldur á háu verði í föstum viðskiptum og verð á ýmsum aukategundum hefur verið á himinháu verði á fiskmörkuðunum.
Fiskifréttir ræddu við Halldór Gestsson, skipstjóra á Kristrúnu RE, um línuveiðarnar. Halldór er Skagfirðingur að ætt og uppruna og er hann stundum nefndur sveitamaðurinn manna á meðal. Það virðist vera góður bakgrunnur því Halldór og áhöfn hans hafa staðið vel fyrir sínu á línuveiðunum þau tvö ár sem Halldór hefur verið skipstjóri á Kristrúnu RE.
Styttum veiðiferðirnar vegna þess hve aflinn er mikill
„Við höfum bara verið hér fyrir vestan landið og aflabrögðin eru búin að vera ljómandi góð. Flotinn hefur mest verið að veiðum á hefðbundnum miðum í Kolluálnum og á Flákanum en að undanförnu höfum við haldið okkur hér í Nesdýpinu. Uppistaðan í aflanum hefur verið þorskur og það er ekki hægt að kvarta yfir hvorki aflanum né afkomunni. Síðustu vikur höfum við verið í heldur blandaðri veiðiskap og það hefur fengist töluvert af ýsu með þorskinum. Við höfum verið að fá fast að 10 tonn af ýsu í lögninni, á um 33 þúsund króka, og svipað magn af þorski. Það er því ekkert óalgengt að fá upp í 20 tonn í lögn en það má segja að það taki okkur um sólarhring að leggja og draga línuna,“ segir Halldór en hann segir að vegna aflabragðanna hafi orðið að stytta veiðiferðirnar og hver veiðiferð standi sjaldnast lengur en fjóra til fimm daga.
Í skipinu er rými fyrir um 60 tonn af fiski miðað við að aflinn sé ísaður í kör en hægt er að koma meiri afla í skipið ef stíurnar eru einnig notaðar.
Að sögn Halldórs hefur þorskurinn í Breiðafirðinum og þar fyrir utan verið af blandaðri stærð í vetur. Mikið hefur verið um þriggja kílóa þorsk en einnig hefur borið nokkuð á sannkölluðum aulaþorski. Telur Halldór að hlutfall hans í aflanum gæti verið um 30% af þorskaflanum þegar á heildina er litið.
Mest er notað af smokkfiski í beitu en þó eru jafnan um 20 til 30% línunnar beitt með síld. Segir Halldór að hvort tveggja þorskurinn og ýsan taki smokkinn fram yfir síldina.
Auk þessara tveggja tegunda hefur dálítið veiðst af Keilu og löngu og þá helst úti í djúpkantinum fyrir vestan landið.
„Við gætum alveg notað sandsíli til þess að auka ýsuaflann en til þess þyrftum við þó að nota sérstaka tregt. Við höfum ekkert lagt okkur eftir því að auka ýsuaflann því við erum með ágætan þorskkvóta og við þurfum að hugsa um þarfir vinnslunnar í landi,“ segir Halldór.
20-25 tonn af þorski á dag en engar lóðningar
Halldór segir að erfitt sé að átta sig á því af hverju línuveiðarnar hafi gengið jafn vel í haust og í vetur og raun ber vitni, ekki síst í ljósi frétta af ördeyðu á ýmsum öðrum veiðum.
„Ástandið í hafinu er skrýtið. Hér vorum við að fá 20 til 25 tonn af þorski dag eftir dag í nóvembermánuði en það lóðaði hvergi á fisk og togararnir fengu engan afla. Ef Hafrannsóknastofnunin hefði verið hér með togararall á þessum tíma þá er ég viss um að fiskifræðingarnir hefðu kveðið upp úr um það einum rómi að það væri enginn þorskur fyrir vestan landið. Staðreyndin er bara allt önnur eins og árangurinn á línuveiðunum sýnir best. Þetta hefur líka komið fram hjá minni krókabátunum. Þeir hafa fengið góðan afla þótt ekkert veiðist í dragnót og í net á svipuðum slóðum. Sjálfum finnst mér mikill munur á ástandi þorsksins nú og í fyrra. Þorskurinn, sem nú heldur sig á Flákanum, er spikfeitur og mjög vel haldinn en í fyrra var hann frekar horaður. Þrátt fyrir þetta virðist hann ekki hafa þétt sig í ætinu þannig að hann komi fram á mælum og sé veiðanlegur í troll. Menn telja að þetta kunni að breytast þegar sjórinn kólnar en það á eftir að koma í ljós. Hvað svo sem gerist þá held ég að það sé nokkuð ljóst að menn mega ekki einblína á togara- eða netarallið þegar þeir ætla að giska á stofnstærð þorsks eftir áramótin. Ég held að það sé vissara að hafa eitthvað af línubátum á svæðinu þegar farið verður í þær mælingar,“ segir Halldór Gestsson.
