Þyrlur Landhelgisgæslunnar og björgunarskip Slysavarnarfélagsins Landsbjargar á Ísafirði og Skagströnd voru kölluð út kl. 12:27 vegna báts sem hvarf úr eftirlitskerfum kl. 09:50 í morgun þegar hann var um 35 sjómílur NA af Horni.
Þrátt fyrir ítrekaðar tilraunir varðstjóra Landhelgisgæslunnar náðist ekki í bátinn eða aðra báta á sama svæði. Nauðsynlegt var að kalla út tvær þyrlur þar sem báturinn var staðsettur meira en 25 sjómílur frá landi.
Loks náðist samband við nærstaddan bát klukkan 12:50 eða þegar þyrla Landhelgisgæslunnar var við það að fara í loftið. Sagði hann bátinn sem leitað var að vera á svipuðum slóðum og allt í lagi um borð.
Á vef Landhelgisgæslunnar s egir að það sé afar slæmt þegar bátar sinna ekki hlustvörslu sem nauðsynleg sé öllum sjófarendum enda geti það orðið til þess að farið verður í ónauðsynlegar og umfangsmiklar leitaraðgerðir.
