Rannsóknaskipið Árni Friðriksson hélt á sunnudaginn af stað í leiðangurinn „Vistfræði Austurdjúps“.
Eitt af meginmarkmiðum verkefnisins er að meta magn og útbreiðslu norsk-íslenskrar síldar og annarra uppsjávartegunda í Austurdjúpi og á austur- og norðausturmiðum.
Frá þessu segir í tilkynningu frá Hafrannsóknastofnun.
Ástand hafsins og vistkerfisins er einnig kannað, m.a. hitastig og magn átustofna. Leiðangurinn er skipulagður af vinnuhóp á vegum Alþjóðahafrannsóknaráðsins (ICES) en auk rannsóknarskipsins Árna Friðrikssonar, taka rannsóknarskip frá Noregi, Færeyjum, Danmörku og Rússlandi þátt í verkefninu.
Leiðangurinn hefur verið farinn árlega síðan 1995 og eru niðurstöður nýttar við gerð stofnmats fyrir norsk-íslenska síld.
Hægt er að fylgjast með ferðum skipsins á meðan á leiðangrinum stendur.
