Rússneskan fiskimann frá borginni Arkangelsk við Hvítahaf rak í rogastans þegar hann dró fisk úr Norður-Dvina ánni sem virtist vera með tennur eins og maður. Frá þessu er skýrt á sjávarútvegsvefnum FISHupdate.com og er vitnað í ekki ómerkari heimild en sjálfa Prövdu. Sérfræðingar við Knipovich Polar hafrannsóknastofnunina telja að hér sé á ferðinni fiskur sem ber latneska heitið herbivorous piranha .
Haft er eftir einum rússnesku vísindamannanna að afar ólíklegt sé að fiskurinn hafi synt frá heimkynnum sínum í hitabeltinu yfir í Norðurhöf og þaðan upp í ána þar sem hann var veiddur. Líklegra er að hann hafi verið fluttur þangað.
Þessa sögu seljum við auðvitað ekki dýrara en við keyptum hana.
