Fiskeldi sem ber ávöxt

Dagur Brynjólfsson sjómaður hefur óvenjulegt áhugamál. Hann ræktar framandi plöntur í gróðurhúsi í Biskupstungum og næringin fyrir plönturnar er fengin úr vatni frá fiskabúri, að því er fram kemur í nýjustu Fiskifréttum.

Slík ræktun sem Dagur stundar kallast sameldi (aquaponics). Dagur var einn af þeim fyrstu til að hefja þessa nýstárlegu ræktun hér á landi. Dagur smíðaði gróðurhús við heimili sitt í Hafnarfirði árið 2010 og hann hóf sameldi þar í ársbyrjun 2013. Í framhaldi af því færði hann út kvíarnar og keypti garðyrkjustöðina Birkihlíð í Reykholti í Biskupstungum.

Í Birkihlíð er Dagur með tilraunaræktun í um 100 fermetra rými. Fiskarnir eru í þúsund lítra búri. Hann ræktaði í fyrra um 90 plöntur í rörum sem vatn frá fiskabúrinu rennur um. Plönturnar nefnast okrur og bera ávöxt eða grænmeti. Grænmetið er aflangt og svipar til chili en er mildara á braðgðið. Hingað til hefur Dagur fóðrað ála í búrinu en hann ætlar að skipta yfir í tilapíu.

Það eru bakteríur sem vinna köfnunarefni, aðalnæringarefni plantna, úr ammoníaki sem myndast í vatninu í fiskabúrinu. Plönturnar dafna vel þótt þær fái engan annan áburð en þann sem kemur frá fiskeldinu.

Sjá nánar umfjöllun í nýjustu Fiskifréttum.