Færeyingar hafa svo gott sem klárað að veiða makrílkvóta sinn. Búið er að veiða um 142 þúsund tonn af um 144 þúsund tonna kvóta og eru aðeins um 1.700 tonn eftir af kvótanum.

Þetta kemur fram í frétt í Færeyska sjónvarpinu. Þar segir einnig að færeysku nótaskipin séu nú að síldveiðum norður af Færeyjum og í Síldarsmugunni. Færeyingar hafa sett sér 105 þúsund tonna kvóta í norsk-íslensku síldinni í ár og þar af er búið að veiða rúm 79 þúsund tonn. Um 26 þúsund tonn eru eftir af kvótanum.