„Við erum fyrir Hafró núna, það er verið að prufa hvalafælur og gera alls konar mælingar,“ segir Guðlaugur Óli Þorláksson, útgerðarmaður og skipstjóri á Hafborgu EA úr Grímsey.
Meðal annars segir Guðlaugur verið að kanna áhrif strauma í Eyjafirði á hæð neta í sjó og hitastig í mismunandi hæð i sjónum. Ýmis sýni séu tekin.
„Við erum með sex aukamenn og þeir verða sjö eftir helgi.“ Að sögn Guðlaugs tekur þetta verkefni við rallinu fyrir Norðurlandi sem áhöfn Hafborgar lauk þátttöku í vestur í Húnaflóa á miðvikudaginn fyrir viku. „Eini staðurinn þar sem við sáum eitthvað af hnísu og hrefnu og slíku var í Eyjafirðin um. Við fengum bara þrjár hnísur í netin í öllu rallinu frá Þistilfirði og vestur í Steingrímsfjörð,“ segir Guðlaugur.
Nú séu vísindamenn Hafrannsóknastofnunar um borð að prófa ýlur sem ætlað sé að fæla hvalina frá netunum.
Grilla það sem ekki fer í sýni
„Eftir að þeir settu ýlurnar á höfum við ekki fengið neina hnísu, þannig að þetta virðist nú hafa einhver áhrif,“ segir Guðlaugur. Aðspurður segir hann ekki hægt að bjarga hnísunum sem flækist í netin.
„Þær eru steindauðar og við étum þær bara. Það sem ekki fer í sýnatöku suður og alls konar rannsóknir, meðal annars á spilliefnum í spendýrum og fleiru sem ég get ekki útskýrt, fer bara á grillið,“segir skipstjórinn og ber lof á hnísuna.
Ánægðir vísindamenn í grilli
„Þetta er alveg listakjöt. Við höfum bara verið að marinera þetta aðeins og krydda og henda svo á grillið. Þetta eru bara tvær mínútur hvoru megin og þá ertu kominn með þetta klárt. Það eru engar sinar eða neitt, þetta er rosalega gott kjöt,“ lýsir Guðlaugur matreiðslunni á hinu dökka hnísukjöti.
Guðlaugur segir vísindamennina um borð, sem séu flestir útlendingar, einnig hafa bragðað grilluðu hnísuna. „Það var að vísu einn sem var vegan og vildi þetta ekki og ein stelpa sem var ekki alveg klár í að éta þetta en hinir voru ægilega ánægðir,“ segir hann. Þetta sé matur sem beri að nýta.
DNA-sýni úr netunum
„Maður er búinn að éta höfrung og hnísu frá því að maður var krakki og þetta er mjög fínn matur. Auðvitað á að nýta allt þetta dót, hvort sem það eru stórhveli eða eitthvað annað. Þetta er bara að keppa við okkur alls staðar,“ segir Guðlaugur. Því eigi að veiða þessar tegundir. „En sú hugsun á nú ekki upp á pallborðið víða í dag,“ bætir hann við.
Mjög mikið er af hnísu að sögn Guðlaugs. „Hér er mikið af smásíld sem elst upp í firðinum og hnísan er á fullu í því,“ segir hann. Æti hnísunnar sé meðal þess sem greint sé við rannsóknirnar. Einnig séu teknar úr þeim tennur til aldursgreiningar.
Eftir helgi segir Guðlaugur að tekin verði DNA-sýni úr netunum til að kanna hvað hefur strokist við þau. „Hvort sem það er þorskur, ýsa eða einhver andskotinn annar,“ segir hann.
Verra en lénsherrarnir
Varðandi sumarið segist Guðlaugur hæfilega bjartsýnn. Veturinn hafi hins vegar ekki verið góður og lítið af fiski. „Það er búin að vera óttaleg hörmung, verið mjög kalt hér fyrir norðan og engin loðna eða neitt æti og þá skil ar fiskurinn sér miklu verr á svæðið. Við fengum átján tonn í fyrstu lögnina hér í Eyjafirðinum og svo hafa þetta bara verið sjö til átta tonn síðan.“
Fram undan hjá Hafborgu er síðan að fara á dragnótaveiðar á kola og steinbít og fleiru.
„Sumarið leggst ágætlega í mann en ef þessi veiðileyfagjöld hækka á þessa örfáu einstæðinga sem eru eftir að reyna að gera út þá sýnist mér ríkisstjórnin fljótlega vera búna að ganga af þeim dauðum. Ríkið er orðið verra en lénsherrarnir í gamla daga. Það er bara eins og púkinn á fjósbitanum, það blæs út eins og fýsibelgur,“ segir Guðlaugur Óli Þorláksson.
