Hafrannsóknastofnun segir að í nýlegri grein sem birtist í tímaritinu Fish Biology sé greint frá því að 700 fisklirfur sem fundust í maga hlýra (Anarhichas minor) hafi verið greindar sem dílamjóri (Lycodes esmarkii).
„Lirfurnar voru allar álíka mikið meltar þannig að hlýrinn hefur étið þær allar á sama tíma. Samkvæmt þessu þá hrygnir dílamjóri eggjum sínum í hreiður og eftir klak eru lirfurnar í því í einhvern tíma,“ segir vef Hafrannsóknastofnunar.
Lítið vitað um fæðunám hlýra
„Rannsóknin sýndi líka fram á afrán hlýra á eggjum og lifrum fiska. Lítið er vitað um fæðunám hlýra og hve mikið afrán hans er á eggjum og lifrum annara fiska. Mjórar eru algengir í Norður Atlantshafi og þáttur þeirra í vistkerfi þess vanmetinn, en rannsóknir á þeim eru fáar. Hreiður mjóra eru afrænd af hlýra og væntanlega öðrum fiskum líka, þannig að upplýsingar um hrygningarsvæði þeirra myndi hjálpa til við að rannsaka dreifingu og fæðunám afræningja þeirra,“ segir á hafro.is.
