Björgunarskip Landsbjargar voru kölluð út frá Siglufirði og Skagaströnd um hádegisbilið og þyrla Landhelgisgæslunnar er farin í loftið til að aðstoða við að ráða niðurlögum elds sem kom upp í íslenskum togara. Togarinn er staddur um 25 sjómílur norðnorðvestur af Sauðanesi.
Samkvæmt upplýsingum frá Landsbjörgu er staðan ekki talin alvarleg í augnablikinu. Eldurinn kom upp í vélarrými togarans og því hefur verið lokað auk þess sem slökkvikerfi var sett af stað. Vonir standa til þess að eldurinn sé nú slökktur. Björgunarskip eru á leið á staðinn og þyrla Landhelgisgæslunnar með reykkafara.
Átta manns eru um borð í togaranum en engin bráð hætta steðjar að áhöfninni. Á þessum slóðum er ágætt veður og gott í sjóinn. Nú er einungis beðið eftir sérhæfðum búnaði og mannskap til þess að komast inn í vélarrými togarans.
