Matvælasjóður hefur úthlutað laxeldisfyrirtækinu Geo Salmo í Þorlákshöfn 15 milljónum króna til vörumerkjaþróunar fyrir landeldislax.
„Langmest af laxi er selt inn á hrávörumarkað og maður gerir sér svo sem engar grillur um annað en að mest allt af laxinum sem við framleiðum fari þangað. En það eru að minnsta kosti tækifæri í því að skoða hvort það eru einhver sérkenni við landeldislax þannig að búa megi til alþjóðleg, hágæða vörumerki í kringum það,“ segir Jens Þórðarson, framkvæmdastjóri Geo Salmo.
Þetta segir Jens að Geo Salmo hafi fengið styrk til þess að gera og sé að skoða það með öðrum eldisfyrirtækjum, alþjóðlegum markaðsfyrirtækjum og fleirum. Ekki sé um mjög mikla fjármuni að ræða.
„Þetta er svona könnunarleiðangur til að sjá hvort hægt er búa til eitthvað sem byggir á sérkennum landeldislax sem gæti annað hvort orðið að einhverju sameiginlegu eða fyrirtækjavörumerki,“ segir Jens.
Ekki fáist mörg skot
Spurður um stöðu landeldis að þessu leyti bendir Jens á að greinin sé enn mjög ung.
© Aðsend mynd (AÐSEND)
„Landeldið er enn að kljást við alls kyns byrjunarörðugleika sem felast að hluta til í tortryggni. En það eru líka gríðarleg tækifæri,“ segir Jens. Á Íslandi sé eini markaðurinn í heiminum þar sem almenningur hafi þekkingu á landeldi.
„Það hefur náðst að sía það inn að það sé spennandi vara og ákjósanleg að einhverju leyti. En þetta er ekki staðan alþjóðlega; það er engin vitund um landeldislax. Við erum að reyna að sjá hvaða tækifæri eru í að búa það til og kannski byggja á þessari sterku vitund sem er á Íslandi,“ segir Jens.
Ekki fáist mörg skot til að þróa verkefnið og því þurfi að hugsa það vel fyrir fram. Með styrknum úr Matvælasjóði eigi að vinna undirbúningsvinnu til þess að átta sig á hvernig sé hægt að gera þetta.
Leita enn að fjárfestum
„Almennt er vörumerkjauppbygging í fiski mjög takmörkuð og mjög lítið gert af henni. Lax er þar á meðal. Við erum fyrst og fremst framleiðslufyrirtæki en þetta er eitthvað sem fyrirtækin gætu skoðað til þess að búa sér til einhverja sérstöðu,“ segir Jens.
Helmingi starfsmanna Geo Salmo, fimm talsins, var sagt upp störfum í mars síðastliðnum þar sem tímaáætlanir um uppbyggingu fyrirtækisins hafa ekki staðist. Jens segir verkefnið nú aðallega snúast um að finna samstarfsaðila sem komi inn sem kjölfesta í félagið.
„Við vorum að klára litla hlutafjáraukningu og hluthafarnir eru að styðja við bakið á okkur á þeirri vegferð að ljúka samtölum við aðila sem ætlum að fá inn sem fjárfesta,“ segir Jens. Þetta taki tíma við núverandi markaðsaðstæður.
„Þegar við förum af stað ætlum við að byggja stóran fyrsta áfanga og ætlum að gera það
hratt,“ segir Jens. Leyfin miðist við 25 þúsund tonna ársframleiðslu en fyrsti áfanginn verði um átta þúsund tonn. Vonandi verði hægt að hefjast aftur handa á þessu ári og að framleiðsla á fiski verði komin í gang um tveimur og hálfu ári síðar.
Seiðaframleiðsla hefst í haust
Geosalmo er einnig að byggja upp seiðaeldistöð sína í Laugum í Landsveit. Jens segir stefnt að því að hún verði komin í gang í haust.
„Við keyptum þessa gömlu stöð fyrir nokkrum árum og höfum verið að taka hana algjörlega í gegn þannig að hún verður glæný með öllum búnaði. Þar getum við framleitt um tvær milljónir af hundrað gramma seiðum á ári. Hún dugar okkur í fyrsta áfangann en áður en hann fer í gang erum við vonandi að selja seiði út á markaðinn,“ segir Jens Þórðarson.
