Brim hf. hefur keypt 278 tonn af hausuðum frosnum þorski, sem samsvarar 370 tonnum af slægðum fiski. Þorskinn veiddi færeyski frystitogarinn Haki við austurströnd Grænlands.
Landað var í Færeyjum og farmurinn fluttur með frystigámum til Akureyrar.
Á heimasíðu Brims segir að verið sé að taka fiskinn í frystiklefann á Akureyri og verði hann unninn í landvinnslunni þar. Því er bætt við að þetta samsvari tveggja mánaða aflaverðmæti hjá íslenskum skuttogara í því kvótaumhverfi sem við búum við í dag.
