Strax frá næstu áramótum verða vottorð um rekjanleika nauðsynleg í útflutningi á þorski og fleiri sjávarafurðum til Bandaríkjanna, að því er fram kemur í tilkynningu frá atvinnuvega- og nýsköpunarráðuneytinu .

Nýjar reglur bandarískra yfirvalda um rekjanleika sjávarafurða taka gildi um næstu áramót. Þær fisktegundir sem krafist verður upplýsinga um eru m.a. þorskur, háfur og aðrar hákarlategundir, sæbjúga og  túnfiskur. Tímasetning á reglu um rekjanleika sæeyra og rækju hefur enn ekki verið auglýstur.

Listi yfir sjávardýrategundir sem eru á lista Bandaríkjanna: *Abalone, Atlantic Cod, Blue Crab (Atlantic), Dolphinfish (Mahi Mahi), Grouper, King Crab (red), Pacific Cod, Red Snapper, Sea Cucumber, Sharks, *Shrimp, Swordfish and Tunas (Albacore, Bigeye, Skipjack, Yellowfin, and Bluefin).

Innflytjendur sjávarafurða í Bandaríkjunum verða krafnir um gögn sem tryggja eiga að rekja megi afurðir sem undir reglurnar alla virðiskeðjuna, til baka til veiðiskips.

Reglur Bandaríkjanna fela ekki í sér sérstakar kröfur á stjórnvöld viðkomandi ríkja, en engu að síður verður á vef Fiskistofu  hægt að sækja um sérstakt rekjanleikavottorð fyrir Bandaríkjamarkað sem rekja afurðir til löndunar veiðiskips.

Í viðbót við ofangreint rekjanleikavottorð Fiskistofu  þurfa útflytjendur/innflytjendur að geta rakið afurðir sem í farminum eru til framleiðenda.

Kjósi útflytjendur að styðjast við önnur vottuð rekjanleikakerfi fyrirtækis frekar en rekjanleikavottorð Fiskistofu er þeim heimilt að gera það, en eru hvattir til að vera í sambandi við sína innflytjendur til að tryggja að viðkomandi rekjanleikakerfi uppfylli kröfur stjórnvalda í Bandaríkjunum.

Útflytjendur eru hvattir til að kynna sér þessar reglur og hafa samband við innflutningsaðila í Bandaríkjunum til að tryggja að réttar og fullnægjandi upplýsingar fylgi sendingum sjávarafurða frá Íslandi frá og með árslokum 2017.

Upplýsingar á vef bandarískra stjórnvalda má nálgast hér .

Fiskifréttir hafa áður skýrt frá hertum innflutningskröfum Bandaríkjanna , sem óljóst var hvaða áhrif myndu hafa hér á landi, sem og viðbrögðum norsku hafrannsóknarstofnunarinnar .