Könnun sem Norska sjávarafurðaráðið stóð að leiðir í ljós að 47% neytenda nefna hátt verð sem hindrun í vegi neyslu á sjávarafurðum. Könnunin leiðir ennfremur í ljós vaxandi áhuga neytenda á ódýrari hvítfiski en þorski, sem gæti falið í sér tækifæri til aukinnar markaðssetningar á ufsa.
Norska sjávarafurðaráðið er markaðsstofnun í eigu norska ríkisins sem vinnur í nánum tengslum við norskan sjávarútveg og hefur það hlutverk að hámarka virði norskra sjávarafurða á grónum mörkuðum sem og leita nýrra markaða.
Í umfjöllun um málið á heimasíðu Norska sjávarafurðaráðsins segir að á tímum sem neytendur finna fyrir hækkandi verðlagi sýni nýjustu tölur að neysla á þorski hafi dregist saman. Samkvæmt athugunum Kantar, sem er leiðandi markaðs- og greiningarfyrirtæki í Bretlandi, hefur neysla þorsks á heimilum þar dregist saman um allt að 18% á undanförnum árum.
Raunhæfur kostur til daglegrar neyslu
Samkvæmt gögnum neytendarannsóknastofnunarinnar SIFO hefur verð á matvöru hækkað tvisvar sinnum meira á undanförnum þremur árum en á annarri vöru. Marktækur samdráttur í neyslu þorsks, t.a.m. í Bretlandi, virðist vera vísbending um meðvitaðar fjárhagslegar ákvarðanir neytenda þegar kemur að kaupum á sjávarafurðum. Fyrir verðmiðaða neytendur getur hvítfiskur þó ennþá verið raunhæfur kostur, segir í umfjöllun Norska sjávarafurðaráðsins. Aðrar tegundir eins og ufsi bjóði upp á fjölhæfni hvað varðar matreiðslu og framreiðslu. Verð á ufsa geri hann að raunhæfum valkosti til daglegrar neyslu.
Próteinríkur matur eftirsóttari en áður
Þó verð skipti sífellt meira máli í vali neytenda á sjávarafurðum þá er eftirspurnin eftir próteinríkum matvælum sívaxandi. Þar fer kynslóðin fædd á árunum 1995-2012 fremst í flokki, svonefnd Z-kynslóð. Hún er líklegri en aðrir til að kaupa heilsusamlegar, ferskar og próteinríkar vörur sem eru með lágt kaloríuinnihald. Sókn í próteinrík matvæli geta rutt brautina fyrir ufsa sem gæti annað eftirspurn þessa yngri neytendahóps. Í samanburði við annan hvítfisk, eins og þorsk og alaskaufsa, er ufsi próteinríkari og auk þess auðugri af öðrum mikilvægum næringarefnum.
Innan við helmingur kvótans veiddur
Norska sjávarafurðaráðið bendir á að ufsi sé einkar sjálfbær valkostur í hvítfiski sem þakka megi sterkum stofni í Barentshafi sem endurspeglist í miklum kvóta þar sem og víðar. Þar segir einnig að ufsi sé mest veidda tegundin um þessar mundir í norskri lögsögu. Hann sé engu að síður hentugur valkostur fyrir neytendur sjávarfangs sem vilja draga úr umhverfisáhrifum með neyslu sinni. Kvótaráðgjöf í ufsa á yfirstandandi ári er 193.000 tonn í Barentshafi og Norður-Íshafi og 79.000 tonn í Norðursjó, Skagerak og Kattegat. Á yfirstandandi fiskveiðiári er aflamark í ufsa í íslenskri fiskveiðilögsögu tæp 68.000 tonn og aflinn sem af er ári einungis tæp 29.000 tonn.
Í könnuninni kemur fram að 85% aðspurðra kannast af eigin reynslu við neikvæð áhrif af loftslagsbreytingum og 46% þeirra segjast af þessum sökum beina kaupum sínum að vörum með sjálfbærni í huga. Það þyki því ljóst að áhugi á sjálfbærum matvælum sé kominn til að vera.
Sögulega séð hefur veiði á ufsa verið undir útgefnum aflaheimildum, jafnt hér við land sem annars staðar. Ufsastofninn hefur því víða haldist tiltölulega sterkur í gegnum árin. Staðreynd sem þessi höfðar til hóps neytenda sem sækist eftir öðrum hvítfiski á góðu verði sem veiddur er á sjálfbæran hátt.
