Arctic Fish og Scale AQ hafa undirritað samning um kaup Arctic Fish á nýjum fóðurpramma og ýmsum búnaði fyrir eldisstöðina í Hvannadal í Tálknafirði. Jafnframt hefur Arctic Fish undirritað samning við Fjord Maritime um rafhlöðu sem fer um borð í prammann sem dregur úr notkun á jarðefnaeldsneyti um allt að 70%. Einnig hefur félagið samið um kaup á eldisbúnaði við Morenot og Fiizk. „Allur þessi búnaður styður við stefnu félagsins um aukið öryggi starfsfólks, betri dýravelferð og minna álags á umhverfið. Heildarfjárfesting vegna þessa er um 1.300 milljónir króna,“ segir í færslu frá Arctic Fish.

Fóðurpramminn sem um ræðir er úr Aasgard línu Scale AQ og er sá fyrsti af þessari stærð sem félagið framleiðir. Hann getur tekið allt að 750 tonn af fóðri og getur fóðrað 8 kvíar samtímis. Pramminn er búinn allri nýjustu tækni til að stýra fóðrun og Fjord Maritime mun setja í hann rafhlöður sem ljósavélar framleiða rafmagn inn á sem nýtt er til að keyra prammann. Með því að hafa rafhlöður minnkar keyrslutími ljósavélanna sem eykur endingu þeirra, dregur úr viðhaldi og eldsneytisnotkun um allt að 70%.

Níu 200 metra kvíar

Samhliða þessu keypti Arctic Fish einnig ýmsan eldisbúnað fyrir starfsemi félagsins. Allur þessi búnaður eykur öryggi starfsfólks, bætir fiskivelferð og dregur enn frekar úr umhverfisáhrifum af starfseminni. Félagið festi kaup á níu 200 metra kvíum og kerfisfestingum fyrir eldisstöðina í Hvannadal í Tálknafirði. Þær koma einnig frá Scale AQ. Félagið hefur um nokkurt skeið haft þessa tegund af kvíum í notkun. Með því að fara úr kvíum sem eru 160 metrar í ummál í 200 metra fær fiskurinn enn meira pláss sem er mikilvægt í þeim veðrum sem geta komið á Vestfjörðum.

Netapokar frá Mörenot

Samið var við Mörenot dótturfélag Hampiðjunnar um kaup á fjórða tug HDPE netapoka sem er mun sterkara efni en félagið hefur áður notað. Þessir netapokar eru úr efni sem ekki eru notaðar ásætuvarnir á og eru því enn umhverfisvænni en fyrri tegundir. Þeir þola enn meira álag en fyrri gerðir sem dregur úr líkum á stroki. Samhliða þessu er félagið í nánu samstarfi við Hamiðjuna á Ísafirði um viðhald á netapokum og öðrum búnaði félagsins. Hampiðjan hefur meðal annars á grundvelli þessa samnings stóreflt þjónustu sína í nýrri þjónustumiðstöð félagsins á Ísafirði á síðustu árum en þar starfa nú hátt í 30 manns.

Félagið hefur einnig fest kaup á um fjörtíu lúsapilsum en það eru segl sem sett eru í efsta hluta kvíar og draga úr ágangi laxa- og fiskilúsar inn í kvíarnar. Pilsin eru keypt frá Fiizk. Félagið hefur notað lúsapils með góðum árangri síðast liðin ár sem vörn við ágangi lúsar á laxinn í kvíunum en með þessu gengur fyrirtækið enn lengra í fyrirbyggjandi aðgerðum gegn lúsinni en áður.