„Þetta nuddast, það eru komnir tíu,“ segir Jón Svansson, hákarlaveiðimaður á Vopnafirði, sem kveðst hafa byrjað vertíðina að þessu sinni upp úr miðjum maí.
„Það hefur skemmst óþægilega mikið og maður er farinn að nenna þessu ekki en ég ætla að gera eina tilraun núna,“ segir Jón sem kveður nokkuð af þeim sautján hákörlum sem hann veiddi í fyrrasumar hafa farið forgörðum í verkuninni. „Ég reiknaði náttúrlega með einhverju en þetta varð heldur meira.“
Hákarlana sautján í fyrra segir Jón almennt hafa verið töluvert minni en þá sem hann sé nú búinn að ná á land.
Diet hákarl
„Þetta hafa allt verið stórir karlar sem ég hef fengið núna að undanteknum þessum sem ég fékk síðast, hann var langur en grannur. Hann hefur verið í einhverju diet-dæmi,“ segir Jón. Hann hafi ekki skoðað þennan hákarl sérstaklega en eitt sinn hafi hann fengið horaðan hákarl sem hafi verið fullur af grálúðunetum.
„Hann hefur verið að slíta fiskinn úr grálúðunetunum sem fóru síðan í magann á honum og varð eins og fótbolti sem hann gat ekki losnað við. Þetta hefur gert honum erfiðara fyrir með nýtingu á æti. Svo fékk ég annan ekki ósvipaðan sem var með net út úr tálknunum svo hann hefur ekki getað andað eðlilega og liðið illa,“ segir Jón.Aðspurður segir Jón nóg af hákarli í sjónum.
Lífríkið geti verið grimmt
„Það er mikið af karli núna og þeir eru að bíta hver annan á fullu, eru bara að éta hver annan. Í síðasta túr fékk ég tvo en annar var bara uppétinn. Það var eiginlega ekkert eftir af honum nema hausinn. Hann hékk saman aftur á sporð en ekkert meira en það,“ segir Jón og útskýrir að eftir að þessi hákarl tók beitu hans hafi aðrir hákarlar ráðist að þessari auðveldu bráð.
„Lífríkið getur verið grimmt. Það var líka búið að bíta þennan granna sem ég fékk með honum en ekki taka nema rétt svona sýnishorn,“ segir Jón.
Varðandi skemmdirnar sem urðu í verkuninni síðast segist Jón ekki vilja segja hversu stór hluti af heildinni það hafi verið. „Við skulum bara segja að það hafi verið of mikið. Það er ekki gott þegar svona gerist.“
Karlarnir eru flestir kerlingar
Eins og áður hefur komið fram í Fiskifréttum er Jón hættur að hengja upp hákarl utandyra til að forðast skemmdir vegna votviðris og umhleypinga í veðri. Það hafi hins vegar verið í kösinni sem skemmdirnar hafi orðið. Hvað nákvæmlega hafi gerst viti hann ekki.
„Þetta eru bara kvendýr sem maður veiðir og þeir sögðu sumir karlar í gamla daga um kerlingarnar að það væri ekki hægt að verka þær. Þeir höfðu örugglega eitthvað fyrir sér í því,“ segir Jón sem kveðst ekki vita hvernig á því standi að það veiðist nær eingöngu kerlingar.
„Ég fékk einn karl í fyrra og hann var lítill og tuskulegur. Það sem maður hefur fengið er yfirleitt lítið,“ segir Jón um karldýrin. Hann hafi fengið sama hákarlinn þrisvar í grásleppunet fyrir tveimur árum.
„Hann var ræfilslegur og kom alltaf aftur og aftur til okkar, hann saknaði okkar svo. Hann var svo lítill að það borgaði sig ekki að veiða hann en svo var hann myrtur af öðrum aðila, ég veit ekki til hvers.“
„Það er svo mikið rugl í kringum þetta“
Jón segist mögulega verða út júní á þessum veiðum. „Það fer eftir veiðinni en ég ætla ekki að taka neitt mikið, það er bara vesen,“ segir hann.
Jón er að verða 67 ára og segir því að ef til vill sé farið sé að styttast í hákarlaveiðimannsferlinum. Kannski haldi hann þó áfram á næsta ári, sérstaklega ef betur rætist úr með verkunina. Eftirspurnin eftir hákarli sé að minnsta kosti enn til staðar. „Það er ekkert vandamál með það,“ segir Jón. Margir minni aðilar í þessum veiðum séu hættir að grípa í þær því eftirlit og pappírsvinna sé orðin svo mikil og kostnaðarsöm. Það þurfi að vera hægt að rekja hákarlana.
„Ég er að veiða þessa hákarla og ég er að selja þessa hákarla og ég veit ekki hverju þessi rakning á að skila. Það er svo mikið rugl í kringum þetta að það er engu lagi líkt.“
