Það sauð upp úr á fundi strandríkjanna um skiptingu uppsjávarafla í Norðaustur-Atlantshafi, sem haldinn var í London 10. og 11. júní síðastliðinn. Á fundinum kynntu fulltrúar Evrópusambandsins tillögu að skiptingu sem felur í sér mikla aukningu á hlutdeild sambandsins og Færeyinga á kostnað annarra þjóða. Tillagan gerir meðal annars ráð fyrir að hlutur Norðmanna í kolmunna fari úr 26,2% í 5,8%.
Allt frá árinu 2015 hefur ESB, Bretlandi, Færeyjum, Noregi, Íslandi og Grænlandi ásamt öðrum strandríkjum í Norðaustur-Atlantshafi verið fyrirmunað að koma á samkomulagi um skiptingu útgefins heildarkvóta Alþjóða hafrannsóknaráðsins sín á milli. Ríkin hafa því hver fyrir sitt leyti gefið út sinn eigin kvóta sem hefur leitt til stöðugrar ofveiði á uppsjávartegundum í Norðaustur-Atlantshafi.
Samkvæmt tillögu ESB, sem var í forsæti á fundinum á London, hefði hlutur Norðmanna í veiðum á kolmunna minnkað úr 26,2% í 5,8%. Hlutur ESB og Færeyja hefði verið stærstur allra aðildarríkja Norðaustur-Atlantshafsráðsins. Tillagan gerði það að verkum að fundurinn nánast leystist upp og ekki var rætt um aðrar uppsjávartegundir, eins og makríl og síld, eins og þó var gert ráð fyrir.
Áhrif á framtíðarsamstarf ESB og Noregs
Tillagan hleypti illu blóði í fulltrúa Noregs og talið er að hún geri frekara samkomulag milli ríkjanna enn torsóttara. Audun Maråk, einn af fulltrú um Noregs á fundinum og framkvæmdastjóri Fiskebåt, samtaka útgerðarmanna í Noregi, gaf út yfirlýsingu á fundinum þar sem hann sakaði ESB um að hafa unnið skemmdarverk á samningaviðræðunum með tillögu sinni.
„Tilefnislaus og órökstudd tillaga ESB um samning um skiptingu kolmunna er skref aftur á bak í átt að samkomulagi, ekki aðeins um kolmunna heldur einnig um makríl og norska vorgotssíld. Tillagan mun einnig hafa afleiðingar fyrir framtíðarsamstarf Noregs og ESB í fiskveiðimálum,“ segir Maråk í yfirlýsingu sinni.
