Frystitogarinn Höfrungur III AK kom til Akureyrar seint í gærkvöldi en þar fer skipið í slipp. Höfrungur III kom til hafnar í Reykjavík sl. mánudagsmorgun með afla sem svarar til um 9.500 kassa en tíu dögum áður fór fram millilöndun í Reykjavík og þá nam aflinn um 12.300 kössum.
Haraldur Árason skipstjóri lætur vel af veiðiferðinni sem stóð samtals í 26 sólarhringa.
,,Það var lögð áhersla á að veiða karfa og grálúðu í veiðiferðinni og við hófum veiðar fyrir við SV-land. Þaðan færðum við okkur norður í Víkurálinn þar sem eru ágæt grálúðumið. Hampiðjutorgið er út af Víkurálnum en þar er yfirleitt togað á dýpi frá um 300 föðmum og niður á 500 faðma dýpi. Við fórum dýpst niður á 450 faðma og fengum ágætis grálúðuafla og svo er alltaf djúpkarfi þarna,“ segir Haraldur í viðtali á vef HB Granda.
Eftir þetta lá leiðin norðaustur á Halamið og þar fékkst ágætur karfaafli.
,,Við enduðum svo túrinn fyrir austan á grálúðumiðunum út af Héraðsflóanum og Seyðisfjarðardjúpinu. Þar heldur grálúðan sig grynnra og mest er togað á 200 til 300 faðma dýpi,“ segir Haraldur en segja að markmiðið með veiðiferðinni hafi náðst því uppistaðan í aflanum var góður karfi og einnig töluvert af grálúðu.
