Um þessar mundir eru að berast rúmlega 9.400 tonn af kolmunna til Síldarvinnsluverksmiðjanna í Neskaupstað og á Seyðisfirði. Beitir NK kom til Seyðisfjarðar sl. nótt með 2.500 tonn og er verið að landa úr honum. Hákon EA er einnig á leiðinni til Seyðisfjarðar með 1.640 tonn. Börkur NK er væntanlegur til Neskaupstaðar í nótt með 3.100 tonn og Barði NK er einnig á leið þangað með 2.200 tonn.

Heimasíða Síldarvinnslunnar ræddi stuttlega við Tómas Kárason, skipstjóra á Beiti, í morgun og spurði hann út í kolmunnaveiðina. „Það verður að segjast að þetta fer vel af stað. Þegar við komum út var mjög góð veiði en síðan dofnaði dálítið yfir henni. Þegar við vorum farnir af miðunum rauk veiðin síðan upp aftur og skipin voru að gera það gott. Veiðin fer fram í færeysku lögsögunni alveg við skosku línuna. Aflinn sem við komum með fékkst í sjö holum og var að jafnaði dregið í 10 – 12 tíma. Við fengum frá 460 tonnum og niður í 170 tonn í holi. Árið byrjar býsna vel og við þurfum að halda vel á spöðunum í kolmunnaveiðinni. Það er mikill kolmunnakvóti og það þarf að nýta tímann vel. Við munum klára að landa seinni partinn í dag og ég geri ráð fyrir að haldið verði á kolmunnamiðin strax að löndun lokinni,“ segir Tómas.