Kleifaberg RE 70 kom til landsins í síðustu viku og landaði rúmlega 600 tonnum en uppistaða aflans var ufsi. Frá áramótum hefur Kleifabergið veitt fyrir yfir 1500 milljónir króna og hefur það aðeins einu sinni áður borið meiri verðmæti að landi á vertíð þ.e. frá áramótum og fram yfir miðjan maí.
Þetta kemur fram í fréttatilkynningu frá Útgerðarfélagi Reykjavíkur.
Árið sem vitnað er til var árið 2015 þegar útgerðin leigði mikinn þorskkvóta af Rússum sem skilaði sér í miklum afla og auknu heildarverðmæti, segir í tilkynningunni.
Verðmæti afla Kleifabergs RE 2012 -2019
Ártal Tekjur milljónum króna
2019 1.525
2018 1.194
2017 1.029
2016 1.375
2015 2.224
2014 1.169
2013 896
2012 1.259
Í tilefni af vel heppnaðri veiðiferð og góðri vertíð fagnaði útgerðin áhöfn Kleifabergsins og færði henni af gömlum og góðum sið girnilega tertu sem var vel fagnað, segir í niðurlagi tilkynningarinnar.
