Hafrannsóknastofnun hefur nú birt niðurstöður makrílleiðangurs Íslendinga, Færeyinga og Norðmanna í júlí og ágúst á vef sínum. Fréttir um meginniðurstöður leiðangursins hafa áður birtst í norskum fjölmið og hefur verið greint frá þeim í Fiskifréttum. Heildarvísitala makríls á svæðinu var um 8,8 milljón tonn, þar af voru 1,5 milljón tonn innan eða rúm 17% innan íslenskrar efnahagslögsögu.
Vísitalan er sú hæsta sem mælst hefur á heildarsvæðinu, en magn makríls innan íslenskrar lögsögu var svipað og mældist árið 2012. Svæðið sem kannað var í ár var mun umfangsmeira en áður og kann það að einhverju leyti að skýra þá aukningu sem mældist á heildarmagninu. Líkt og fyrri ár var einungis hluti lögsögu Evrópusambandsins kannaður.
Fjögur skip tóku þátt í leiðangrinum, eitt frá Íslandi og Færeyjum og tvö frá Noregi, sem fram fór á tímabilinu 2. júlí til 9. ágúst. Magn og útbreiðsla makríls á svæðinu var metið út frá afla í togum sem tekin voru með reglulegu millibili og var rannsóknasvæðið um 3,2 milljónir ferkílómetrar.
Í leiðangrinum var vart við töluvert af tiltölulega smáum makríl og aldursgreiningar sýna nokkuð hátt hlutfall árgangsins frá 2010 (20% af fjölda), en einnig voru áberandi árgangarnir frá 2006, 2007 og 2011 með um 15% hver. Þetta er í samræmi við afla íslenskra veiðiskipa í sumar.
Þó svo að niðurstöður þessar séu ekki enn þá lagðar til grundvallar við mat á stofnstærð makríls hjá Alþjóðahafrannsóknaráðinu (ICES), staðfesta þær líkt og leiðangrar fyrri ára, víðáttumikla útbreiðslu makrílsins. Þá sýna þær að elsti makríllinn ferðast lengst í sínum ætisgöngum í Norðaustur Atlantshafi á sumrin, en hann var einkum að finna vestast og nyrst á rannsóknasvæðinu.
Sjá skýrslu um leiðangurinn á ensku hér
