Meðal niðurstaðna í stofnmælingum botnfiska að haustlagi sem Hafrannsóknastofnun stendur fyrir, er að stofnvísitala þorsks hækkar í ár eftir töluverða lækkun árin 2018-2021 og stofnvísitala ýsu er með þeim hæstu síðan mælingar hófust. Sama á við um vísitölu gulllax sem er sú hæsta sem mælst hefur í haustralli.

Hafrannsóknastofnun hefur tekið saman helstu niðurstöður stofnmælingar botnfiska að haustlagi en leiðangurinn fór fram dagana 1.-27. október 2022. Verkefnið hefur verið framkvæmt með sambærilegum hætti ár hvert frá 1996.

Stofnvísitala þorsks hækkar í ár eftir töluverða lækkun árin 2018-2021. Hækkunina má rekja til þess að vísitala 80 cm og stærri þorsks var yfir meðaltali rannsóknartímabilsins. Stofnvísitala ýsu er með þeim hæstu síðan mælingar hófust og sama á við um vísitölu gulllax sem er sú hæsta sem mælst hefur í haustralli.

140 fisktegundir í haustralli

Hins vegar eru vísitölur ufsa, grálúðu og blálöngu lágar eins og undangengin ár. Vísitala gullkarfa hefur lækkað töluvert frá hámarkinu árið 2017, en er svipuð í ár og undanfarin tvö ár. Vísitala djúpkarfa hefur haldist svipuð í um tuttugu ár. Vísitölur hlýra, hrognkelsis, sandkola, skrápflúru, slétthala og tindaskötu eru í sögulegu lágmarki. Vísitölur flestra brjóskfiska lækkuðu eða stóðu í stað frá fyrra ári og vísitölur flestra annarra djúpfiskategunda voru undir langtímameðaltali.

Árgangar þorsks frá 2021 og 2022 mældust undir meðalstærð í fjölda. Meðalþyngd flestra árganga þorsks, fyrir utan 1 og 2 ára, mældist um eða yfir meðaltali áranna 1996-2022. Árgangur ýsu frá 2022 mældist undir meðalstærð í fjölda en árgangur 2021 yfir. Nýliðun gullkarfa og djúpkarfa hefur verið léleg undanfarin ár en vísbendingar eru um bætta nýliðun í stofnum grálúðu og blálöngu.

Alls fengust um 140 fisktegundir í ár, þ.á.m. þverhyrna sem er ný tegund á íslensku hafsvæði.

Mælingar á botnhita sjávar sýndu svipaða þróun og í fyrra þ.e. kólnun á 1-400 m dýpi fyrir vestan, norðvestan og norðaustan. Fyrir sunnan er botnhiti með svipuðu móti og í fyrra en hitastig mælist nokkuð breytilegt fyrir vestan.

Sjá nánar frétt Hafrannsóknastofnunar hér.